Harry Houdini, o famosísimo rei do escapismo, nas súas actuacións no escenario facía un efecto realmente impresionante. Durante o seu espectáculo uns albaneis ían construíndo con ladrillos e cemento unha parede sobre un enmadeirado cunhas rodas pequenas. Chegado o momento da representación do efecto, pedíase a varios voluntarios que subisen. Sobre o escenario colocábase unha alfombra que fora coidadosamente examinada para previr o uso de trapelas debaixo do escenario. Sobre a alfombra colocaban a parede (velaí o porqué das rodas e a táboa) e a ámbolos dous lados da parede dous biombos. Un comité de espectadores do público rodeaba por completo parede e biombos, como se ilustra no diagrama.

Houdini entraba por un dos biombos e sacaba unha man por encima mentres dicía: "¡Estou aquí!". Inmediatamente saía polo outro biombo. Non podía pasar por debaixo porque a alfombra impediría que pasase polo medio dunha trapela. Non podía ir por detrás porque os espectadores habían velo. Tampouco podía pasar por encima pola mesma razón. A parede fora construída durante o espectáculo e, polo tanto, non podía estar trucada de ningunha maneira. E sen embargo, Houdini pasaba dun lado a outro con suma facilidade... Pero, ¿como?

Disque Houdini lle contou ó mago Antón cáles eran os ladrillos que tiña que arrepuxar para atravesar a parede. Do outro lado explícanse segredos celosamente gardados polo Mago Antón. Cubre o seguinte cuestionario e envíanolo. Nese caso, poderás obter a chave por e-mail e así accederes ó outro lado. Sorte. (Só para profesionais e amateurs da maxia).